Non podía faltar. Sen a xa arquicoñecida excursión ás illas Cíes non se dá por rematado o curso no IES CARLOS CASARES. É xa unha tradición que vai pasando de alumnos a alumnos. O xoves 23 de xuño deste ano, organizado pola Vicedirección do centro e con afluencia masiva da comunidade educativa, sobre todo de alumnado, do que asistiron 273, así como de persoal administrativo, conserxes, persoal da limpeza e da cafetería conquistamos en bloque as illas. O obxectivo era pasarmos un día xuntos en semellante paraxe natural, de beleza paisaxística inigualable. O que si notamos é que se vai perdendo ano a ano aquel espírito deportivo e andareiro co que naceu esta actividade. A xente anda con poucos folgos xa ao final de curso, debe ser polo tempo dedicado aos exames finais, abofé, e poucos son os que, con afouteza, gañan o cume do faro grande. Os máis, seica por lesións deportivas, por indisposicións pasaxeiras ou por depresión postexames, males dos que non dubidamos padezan, quedan tombados na branca e aveludada area na procura da saúde perdida durante o duro curso que remata.
Bañar bañámonos, nesas que din seren das mellores praias do mundo (?!). Xogamos, divertímonos, queimámonos co sol... Unha ledicies!
No hay comentarios:
Publicar un comentario