Os obxectivos deste programa inserido dentro do PLAN PROXECTA son fomentar a participación activa e responsable dos escolares na protección do medio natural fronte aos incendios forestais, permitindo que tomen conciencia dos valores dos bosques, o seu uso sostible e a contribución á protección da biodiversidade.
O programa céntrase en incrementar a concienciación sobre os incendios forestais e a súa influencia sobre o equilibrio ecolóxico, as perdas que supón en canto a diminución da biodiversidade, da capacidade produtiva do monte, da calidade das augas, do ocio...
O obxectivo principal do noso proxecto foi fuxir da visión idílica da natureza e salientar a necesidade de intervención e xestión do medio; procurar un equilibrio entre conservación, economía e uso do territorio prestando atención á perda de recursos naturais e económicos tras un incendio forestal.
Realizamos a toma de conciencia a través da motivacion e a emoción. Dende a educación artística buscamos unha comprensión emocional da contorna " Hai que vivir os espazos, sentir como se pechan arredor nosa" (Ramussen, 2000). Traballando a partir de imaxes fixas non podemos facer noso un espazo. Os espazos son para seren vividos, non só contemplados.
Visitamos a instalación "A imaxe arde" (Lois Patiño). O artista colócanos ante unha imaxe de lume constantemente reinterpretada nunha estancia totalmente escura e con sons que fan que nos relacionemos coa imaxe afianzando o seu significado: o son do lume, abstracción electrónica, reconstrución sonora ... e mesmo o silencio.
O alumnado sitúase en solitario fronte ao lume e pode sentir o perigo, a imaxe sen forma, a sucesión de fulgores no baleiro da noite, hipnótica, atrapando a súa mirada.
Ademais das actividades e saídas relacionadas co programa, consideramos que é importante que o alumnado tome conciencia das desastrosas consecuencias que implica un incendio no monte. Por este motivo, na materia de Ciencias da Natureza decidimos dedicarlle varias sesións para poñer de relevo a importancia dos nosos ecosistemas, non só formadores de paisaxe, senón outros moitos aspectos iguais ou mesmo máis graves: a dimensión medioambiental, a dimensión social, a económica e mesmo a meramente patrimonial.
Os alumnos e alumnas de 2º ESO A veñen de realizar un vídeo imitando o teatro de sombras no que expoñen as perdas de recursos sociais, patrimoniais, ecolóxicos e económicos que se derivan tras dun incendio.
O 7 de maio visitamos a base da Brigada helitransportada do Campiño. Fomos recibidos polo responsable da mesma quen, xunto con outros integrantes do seu equipo, nos amosou as instalacións e o equipamento do que fan uso nos numerosos incendios que anualmente teñen lugar na nosa comunidade. Logo da visita e das pertinentes e amenas explicacións, proxectáronnos unha reportaxe da mesma brigada en plena acción durante un incendio, seguida dunha charla na que o alumnado participou con comentarios e preguntas dirixidas aos protagonistas da reportaxe, os cales salientaban a enorme perda, tanto económica como de recursos, que supón cada un dos incendios que o noso monte ten que aturar.
En definitiva, foi un día moi instrutivo pois cremos que supuxo unha aproximación e un enfoque diferente a esta praga que nos ataca todos os anos.
Alfredo Couceiro (responsable da base helitransportada do Campiño) deixou claro ao noso alumnado, con didácticas similitudes axeitadas para a súa idade, a ingratitude do lume e o traballo de prevención que a brigada fai durante todo o ano.
Un grupo de alumnos e alumnas de 2º ESO A plasma a impotencia do paso adiante e paso atrás ("Penélope", DÍAZ CASTRO) coa seguinte curta:
ALMUDENA LACOMBA MARURI
