Seis alumnas do noso IES en InvestigArte

Por incrible que pareza, ciencia e arte teñen máis elementos comúns que diverxentes. Aínda que perseguen obxectivos dispares, ambas as dúas esixen calidades e formulacións similares e dalgunha forma recíprocas.

Ambas as dúas baséanse na experimentación, a observación e a busca de novas ideas que rompan co anterior abrindo novas fronteiras. Non esaxeramos se dicimos que a arte necesitou moita ciencia para conseguir -por medio de diferentes técnicas e tecnoloxías- producir ou reproducir paisaxes, retratos, ilusións, sensacións… Á súa vez, a ciencia necesitou de moita creatividade e imaxinación para buscar a solución a problemas aparentemente irresolubles así como para desenvolver experimentos cos que testar novas ideas.

O coñecemento da anatomía humana e as proporcións foi fundamental para dar lugar a obras como o David ou a Monalisa. Imaxinar que o home podería pór o pé na lúa -dalgunha forma- foi o primeiro paso para facer que isto fose posible.

Ciencia e arte poden chegar a ter principios comúns como poden ser a proporción áurea ou a secuencia de Fibonacci.

O obxectivo de investigarte é precisamente este, indagar nos puntos comúns de ciencia e arte e dalos a coñecer aos interesados en ambas disciplinas.

Aixa, Ana López e Sira de 1º ESO C e Claudia, Julia e Ruth de 2º ESO C presentaron as súas obras neste certame que pretende espertar entre o alumnado vocacións científicas dando unha visión artística da ciencia.

No seguinte enlace podedes ver as ilustracións e votar a que máis vos guste activando o corazón baixo a imaxe, na parte esquerda.

http://www.investigarte.es/galeria/alumnos/

Sorte a todas!

1º ESO E PCPI ESTUDANDO A BIODIVERSIDADE DA ZONA DE BAIONA

O día 12  de maio, 1º da ESO e PCPI realizamos unha saída didáctica de organizada pola profesora MARTA do departamento de Ciencias Naturais, acompañada pola profesora SUSA.

Á mañá do luns marchamos ata praia América. Alí, empezamos a camiñar. Despois de andar un tempo, chegamos á parte baixa do Monte Lourido, no que observamos a convivencia entre paisaxe natural e humanizada. Nesta zona, atopamos árbores como eucaliptos e piñeiros, estes últimos, máis preto da praia. Tamén haibía gran cantidade de rochas, como xistos.

Xa nas marismas, vimos patos comúns e unha garciña branca, que non chegamos a identificar ben. Ademais, a nosa profesora Marta ensinounos algunha alga verde, como a leituga de mar.

Atravesamos todo o camiño da Ramallosa, algúns de nós, quedaban atrás, e tiñamos que parar numerosas veces para así volver xuntarnos.

Despois de moito andar, por fin demos con Praia Cuncheira, situada preto de Monterreal, Baiona. Alí puidemos merendar e descansar un chisco. Pero, a nosa profesora xa logo empezou a movernos: “ Dez que veñan comigo  ás rochas”. Despois que eses dez fosen coa profe, os demais quedamos na area, buscando cunchas, etc.

Atopamos moitas, e incluso esponxas e esqueletos de ourizos (moi fráxiles).

Cando tocou a nosa quenda, Marta falounos das actinias, dos ourizos... mentres os compañeiros, estaban máis atentos aos cangrexos, outros non obstante meteron o pé nas pozas “sen querer”.

Rematamos a parada en praia Cuncheira, tocaba coller o bus para visitar o paseo fluvial do río Fraga. Nesta zona, vimos fieitos, carrizas e numerosas flores, ademais de zapateiros e paxaros. Algúns, tiveron mala sorte, e picáronse con ortigas. Ao rematar o paseo, fixéronnos fotos de grupo. A verdade, foi a etapa máis aburrida (pero polo menos á sombra) da saída.

Sabiamos que faltaba menos para xantar, e regresar cara a praia América. Pero, quedaba moito camiño por diante...

Cando por fin chegamos ao parque da Ramallosa para comer, foi todo un alivio. A partir dese momento, as profesoras, deixáronnos por libre.

Estivemos un tempiño correndo por alí, na tirolina e nos aneis, nos que máis de un destacou, pero, tiñamos que seguir ata praia América...

Despois dun longo paseo, e moito sol, puidemos tirarnos na area e descansar. Ou correr. Ou tirar area. O caso é que só faltou nadar un pouco!

CLAUDIA ÁLVAREZ COSTAS, 1º ESO C