EXPO "CARTAS DE AMOR". NON Á VIOLENCIA!

A Secretaría Xeral da Igualdade da Xunta de Galicia cedeu, a pedimento do noso centro, a exposición "Cartas de amor", onde quince artistas plásticos do país e de fóra plasman situacións que pretenden facer reflexionar á mocidade sobre a vixilancia ante a violencia nas parellas, utilizando diversas técnicas, nomeadamente a do cómic.

CONTACONTOS E CANTIGAS EN FRANCÉS NA ESCOLA DE IDIOMAS PARA O NOSO ALUMNADO

O pasado venres 14 de febreiro, o DEPARTAMENTO DE FRANCÉS do noso instituto organizou unha actividade cultural consistente na asistencia na ESCOLA DE IDIOMAS da nosa vila a un espectáculo integramente en francés onde o noso alumnado puido escoitar un contacontos que tamén cantaba cantigas na lingua de Molière. Asistiu o alumnado de francés de 3º, 4º e 1º BACH. Saíron contentos, aprenderon e pasárono ben.

En febreiro, o día de San Valentín, os alumnos de francés de 3º e 4º de ESO deixamos o instituto, cheo de corazóns para a ocasión, para ir á Escola Oficial de Idiomas a ver unha representación teatral.

Tratábase dun contacontos, en francés, loxicamente. O home era moi divertido e coas súas caras e os seus xestos fixo que o público rise ás gargalladas. Contounos catro historias, as catro un pouco estrafalarias, sobre todo unha que tiña como protagonista unha fada que todo o solucionaba facendo aparecer gnomos. Ademais, este home tan completo, amenizou o espectáculo con música. Primeiro tocou a arpa, como fondo da súa primeira historia; despois interpretou unhas cancións de amor dirixidas a unha rapaza do público. Para rematar cantou “Petits Oeillets”, a versión francesa do coñecidísimo “Caraveliños”.

Saímos todos cun sorriso do salón de actos da EOI. Encantaríame poder repetir esta actividade.

MARTA ALONSO (3º ESO A)

GRUPO BIBLIOTECA: OUTRA VARIEDADE, EXITOSA, DOS CLUBS DE LECTURA

O Grupo da Biblioteca organiza os martes durante o primeiro recreo nunha aula do soto un club de lectura especializado en relatos literarios curtos. A profesora MARILÓ, que é quen se ocupa desta actividade, escolle cada semana un relato de curta duración para que poida ser lido durante un recreo. A esta actividade, que naceu pensada para os bacharelatos, acode hoxe alumnado doutros niveis, nomeadamente 3º e 4º ESO. Chapeau! por esta interesante iniciativa que difunde a lectura e crea lectores.

SAN VALENTÍN NA BIBLIOTECA: RECITAL POÉTICO E CONCURSO DE CARTAS DE AMOR

A celebración do San Valentín por parte da Biblioteca foi un éxito rotundo de participación, tanto no recital poético na biblioteca como no concurso de cartas de amor escritas polo alumnado de 4º da ESO e votadas por todo o alumnado.

Durante o 1º recreo e na biblioteca tivo lugar o recital poético levado a cabo polo alumnado de 1º ESO A, coordinado e dirixido pola súa profesora SUSA. O alumnado deste grupo recitou unha escolma de poesía amorosa en lingua castelá.

Durante os dous recreos todo o alumnado do centro que quixo, e foron moitos, votou polas cartas de amor escritas polo alumnado de 4º da ESO, expostas nas escaleiras de subida desde a entrada. No momento de votar eran obsequiados pola biblioteca cunha piruleta vermella en forma de corazón alusiva á festa.
A ganadora do Concurso de Cartas de Amor foi:
ANTÍA GATO ÁLVAREZ (4º ESO B). Como podedes observar na foto superior, a entrega do premio tivo lugar no festival do Entroido. 

Iso, si, non vimos moita xente vestida de vermello como sempre foi habitual nesta data, agás algunha profesora e algún que outro alumno. Vanse perdendo os costumes...

CLUB DE LECTURA DE ADULTOS DO ICC

Unha nova xeira do agora Club de Lectura de Adultos (antes Club de Lectura do Profesorado, ampliado agora con persoal non docente) no noso instituto. Logo do xa habitual "xantar de traballo" na cafetería do instituto, servido polas nosas compañeiras Celia e Tina, xuntámonos na biblioteca para seguir dando conta das nosas lecturas e en animado faladoiro fomos debullando unha a unha as tres obras suxeridas para a lectura durante o primeiro trimestre. Unha cousa nos quedou clara, por se non o soubésemos xa: os cacarexados premios literarios e publicitados a bombo e platillo non son garantía de calidade, nin moito menos. Nesta ocasión, os autores patrios quedaron bastante mellor parados.

E xa temos marcadas novas tarefas para o segundo trimestre: unha novela gráfica, tamén de autor patrio (MIGUEL ANXO PRADO), avalada pola boa crítica ("Ardalén") e unha tradución do danés de JANNE TELLER ("Nada"). Teremos a oportunidade de xulgar se esta última é tan impactante como a crítica a describe. 

Boas lecturas, benqueridos compañeiros.

              

MODERNIZANDO E VISUALIZANDO A BIBLIOTECA

Fixemos a nosa BIBLIOTECA máis visible... Como está un pouco arredada dos percorridos habituais do centro, queriamos que salientase, que fose máis visible, aínda que quede aló no fondo. 

Quedounos chulo o cartel enriba da porta, eh?!

A TUIA XA NON É NOSA

Era unha tuia a un instituto pegada
era unha tuia, agora non é nada.
Era unha tuia por todos admirada
era unha tuia, agora xa non é nada.

Pois si, queridiños, aquela árbore grandeira que desde a estrada xa se enxergaba,
pegada ao instituto
e que no seu logo sempre destacaba,
FINOU,
deixou de ser tuia, deixou de ser testemuña da nosa historia.
Ela coñecía todo o alumnado e todo o profesorado que diante dela pasaba, era a memoria viva do noso instituto
FINOU.
Pero non esteades tristeiros, cando algo remata, algo comeza, e hoxe temos un
CUPRESSUS LEYLANDII
a carón do toco da tuia
que medrará
que será de novo testemuña
dos vindeiros alumnos
dos vindeiros profesores
e de novo gardará na súa memoria
o mellor da nosa historia.

2º DE ESO NA NEVE

PROFESORADO ACOMPAÑANTE:

ALEJANDRO (EDUCACIÓN FÍSICA)

JOSÉ MORAL (TECNOLOXÍA)

   

 O día tres de febreiro, ás nove da mañá, estabamos impacientes pola chegada do autobús con destino a Leitariegos. A viaxe en bus estivo chea de risos e de bos momentos. Fixemos dúas paradas, unha nunha cafetaría para descansar e comer a merenda de media mañá e, máis tarde, nunha vila para almorzar.

Ao chegarmos, a paisaxe pareceunos preciosa. Todo era branco, impresionante. Entramos no albergue e repartiron os dormitorios. Deixamos as cousas, despois déronnos os esquís, os cascos e as botas e fomos xogar á neve. Fíxose de noite moi cedo. Déronnos tempo para ducharnos e fomos cear. Logo da cea fixemos a nosa primeira velada nocturna, na que falamos de todo o que iamos facer durante a nosa estadía. Ao acabar, sobre as doce da noite, mandáronnos ir durmir.

Ao día seguinte levantámonos, puxemos a roupa e ensináronnos a poñer as botas, que non eran nada cómodas. Fomos almorzar e saímos cara á estación de esquí. Alí aprendemos a poñer os esquís e a deslizarnos pola neve. Despois fomos comer e pola tarde xogamos cos monitores. Logo dunha xornada intensa fomos cear. Máis tarde fixemos outra velada nocturna na que xogamos ao “Chini Chino”. Ao principio pensamos que nos estaban tomando o pelo, pero despois resultou moi divertido. Ás doce, coma sempre, tiñamos que ir durmir. Deixábannos falar pero en baixo, aínda que saímos dos cuartos para estar con máis xente.

Chegou o terceiro día e fomos esquiar pola mañá. Pola tarde visitamos unha vila preto da estación de esquí. Alí fixemos un xogo dirixido polos monitores. Este consistía en preguntarlle á xente sobre animais, comidas típicas e outros temas da zona. De regreso comezamos outro xogo que consistía en evitar dicir unha palabra prohibida. Cada día había unha palabra nova. Aquel que a dixera debería levar unha pinza e, ao final de todos os días, facía unha proba. Cando chegamos ao albergue, fixemos bonecos de neve e despois a nosa xa habitual velada nocturna.

O xoves comezou o día con moito vento e non puidemos ir esquiar. Fixemos un paseo con raquetas de neve. Custounos chegar arriba, pero valeu a pena. A paisaxe era espectacular, chea de montañas con moita neve. Pasou moi rápido e chegou a hora de comer. Pola tarde, xa que escacharan as ventás do bus debido ao vento, vimos una peli na sala común e máis tarde ceamos e fixemos a velada nocturna. Nesta ocasión cada dormitorio debía realizar unha actuación consistente en cantar, bailar, etc.

E chegou o último día. Espertamos e, por primeira vez na semana, puidemos subir ás pistas. Ensináronnos a coller o telecadeira e subimos. A pista era enorme, comparada coa de abaixo, que era a que nós coñeciamos. Ese día aprendemos tamén a coller o telesquí e subimos polas pistas. Estivemos alí toda a mañá facendo carreiras. Despois comemos, vimos unha película e emprendemos viaxe de volta cara ao instituto de novo. Desta vez a viaxe foi máis silenciosa xa que había xente durmindo. Chegamos, despedímonos dos monitores, collemos as maletas e marchamos cara ás nosas casas.

Todo o bo ten un final.

Mª ISABEL ESTÉVEZ DOMÍNGUEZ

ANDREA GONZÁLEZ ALONSO (2º ESO A)

2º ESO NO MUSEO DO MAR: "O MUNDO SUBMARINO"

Os pasados días 16 e 17 de xaneiro o profesor JOSÉ MORAL acompañou os 3 grupos de 2º da ESO a unha visita cultural ao Museo do Mar.

Nesta actividade coñecimos as dististas formas empregadas polos seres humanos ao longo do tempo para conquistar o mundo submarino. Coñecimos as técnicas empregadas xa polos romanos para mergullárense nas profundides marinas e como estas técnicas foron evolucionando co paso do tempo.

O día 16 de xaneiro de 2014 os alumnos do IES Carlos Casares de 2º A e 2º C da ESO fomos visitar o Museo do Mar, situado na Avenida Atlántida, 160 da cidade de Vigo.

   Este museo representa a importancia do mar e da pesca na vida de Galicia.

   Unha vez alí sepáramonos en dous grupos: os de 2º C dedicáronse a observar e adquirir novos coñecementos sobre a cultura mariñeira galega e os de 2º A visitamos a parte dedicada ó submarinismo.

   Primeiro pasamos ao acuario. Alí atopamos moitas especies galegas: sargos, mexillóns, fanecas, raias, maragotas...

   Máis tarde, ensináronos diferentes traxes de mergullo e un submarino.

    Ao final vimos o esqueleto dun cachalote femia antes de volver. Foi unha visita moi didáctica e divertida para todos nós.

  

JAVIER RÍO CARBALLEDA 2º ESO A.

NAMÓRATE NA BIBLIOTECA

O GRUPO DA BIBLIOTECA organiza este curso distintas actividades relacionadas co DÍA DE SAN VALENTÍN:

1) Adorno do espazo da biblioteca con motivos relativos ao amor.

2) Exposición de poemas de amor escollidos polo profesorado.

3) Concurso de cartas de amor redactadas por alumnado de 4º da ESO. O propio día de San Valentín realizarase a votación por parte do alumnado.

Tiveron moi boa acollida estas actividades, a xulgar pola participación tanto do profesorado como do alumnado.