viernes, 21 de diciembre de 2007

PATINANDO SOBRE XEO




Os alumnos de 2º de ESO foron a patinar sobre xeo.
Pasar, pasárono ben; non hai máis que ver os rostros de satisfacción...

Algún e algunha deberán entrenar máis para mellorar o seu estilo, pero, verdadeiramente teñen posibilidades. Así que ánimo, que esperamos que de entre vós saia algún ou algunha artista que nos faga disfrutar coas súas piruetas rítmicas.


Aproveitamos para desexar un
BO NADAL a toda a comunidade educativa: pais, nais, alumnas, alumnos, profesores, profesoras, administrativos, conserxes, responsables da cafetería, persoal da limpeza, de mantemento, xardineiros, conductores de autobús, a TODOS e TODAS os mellores desexos...

jueves, 13 de diciembre de 2007

UN DÍA EN SOTAVENTO



O día que fomos a Sotavento pasámonos no bus seis horas. Logo de tres horas de viaxe e unha vez alí, o día cambiou moito. Na autoestrada facía calor e sol, arriba moito frío, néboa e vento.

Ao principio déronnos unha charla sobre o funcionamento dun muíño eólico e os paneis solares térmicos. Despois deixáronnos tempo para comer e mirar o museo-exposición que tiñan dentro do edificio. Pola tarde leváronnos a ver un muíño eólico e volvéronnos a explicar a súa función e funcionamento. Finalmente volvemos a Vigo noutras tres esgotadoras horas de autobús.

A excursión gustoume. Foi explicativa e bastante entretida. Ademais fomos varios grupos de diferentes cursos e iso aínda o fixo máis divertido.

Xosé Casal (4º C)

Novo curso...

Comezamos o curso... con ganas, pero este Blog tiñámolo un pouco "aparcado". Agora sí, imos "movelo" un pouco. Para iso temos excelentes reporteiros e reporteiras (os alumnos e alumnas) que van a ir contando as súas diferentes experiencias ó longo do curso.

Tamén comezamos con novo equipo directivo e algunhas novidades máis: a formación do profesorado nas Tecnoloxías da Información e da Comunicación (as famosas TIC). Tamén se iniciaron novas asignaturas: Proxecto interdisciplinar, Taller de iniciativas emprendedoras... Estamos perfilando e traballando no Plano de Convivencia... En fin, xa vedes que comezamos con ímpetu. Agora hai que manter o esforzo para poder ir sacando adiante todos os proxectos que iniciamos...

Xa vos iremos contando máis novidades desde este medio. Ánimo e bó curso e, tamén -¿como non?- Felices Festas a TODOS e a TODAS.

jueves, 28 de junio de 2007

CONCURSO «CINCO OCÉANOS, CINCO SENTIDOS»

Coincidindo coa celebración do Día Mundial do Océano, o Centro Oceanográfico de Vigo convocou un concurso de debuxo. O noso alumno de 1º de ESO, André García Iglesias foi un dos gañadores do devandito concurso. Aquí podedes ver a noticia que saíu no Faro de Vigo. O premio consistiu en que tres alumnos do noso centro participaran nunha xornada de investigación a bordo do buque do Centro Oceanográfico e ver como se coida da nosa ría desde esta institución.

Seguro que foi unha xornada moi interesante e que deixará unha importante pegada nos nosos alumnos.

Outra vez noraboa ós nosos alumnos, neste caso especialmente a André. E por suposto, á súa profesora de plástica.

martes, 29 de mayo de 2007

FINALISTAS AUTONÓMICOS DO XXVI CONCURSO ESCOLAR «¿Que é un Rei para ti?»



Clara Copena Amigo, Teresa García González e Nicolás Lago Casabella de 1º de ESO, quedaron entre os 40 finalistas autonómicos entre os 2150 traballos presentados para o Concurso «¿Que é un Rei para ti?».
Onte, 28 de maio, asistiron ó acto de entrega de premios xunto coas autoridades académicas entre as que estaba a Conselleira de Educación da Xunta de Galicia, Laura Sánchez Piñón e a Directora Xeral Mª José Pérez Mariño, acompañados pola Directora e a profesora de Plástica do Instituto.

Noraboa ós nosos alumnos polo bó traballo realizado.

lunes, 7 de mayo de 2007

VI Concurso de Debuxo de Educación Viaria. LUGO

VI Concurso de Debuxo de Educación Viaria.





O xurado da VI edición do Concurso de Debuxo de Educación Viaria Cidade de Lugo seleccionou os debuxos gañadores deste certame destinado a todos os escolares e estudantes de Secundaria e Bacharelato de toda Galicia.

Nesta edición participaron 36 centros educativos de toda Galicia e batiuse o récord de participación ao acadar os 827 debuxos presentados.

Os membros do xurado coincidiron en salientar a extraordinaria calidade dos traballos presentados e a capacidade dos rapaces para reflexionar sobre a gravidade dos problemas que orixina o tráfico. Os nenos que participaron abordaron este tema desde distintos puntos de vista, tanto desde o drama dos accidentes de circulación ou o caos dos atascos, como desde a perspectiva da prevención e da aplicación de boas maneiras na condución.


Categoría D. (4º secundaría, 1º y 2º de Bacharelato):
1º.- Iria Lores Villar do CPI. Covaterreña de Baiona - Pontevedra
2º.-Iria Barroso Fernández do IES. Lagoa de Antela de Xinzo de Limía - Ourense
3º.-Iván Davila Quintas do IES. Carlos Casares de Vigo - Pontevedra


Centro escolar con maior calidade artística:

IES. Carlos Casares de Vigo - Pontevedra

viernes, 27 de abril de 2007

FORUM ORIENTA 2007

O martes, 24 de abril fomos os alumnos de 1º e 2º de bacharelato a Santiago ó Forum Orienta 2007, que organiza a Consellería de Educación para axudar ós mozos e mozas de Galicia na súa toma de decisións unha vez rematado o bacharelato.

Alí poidemos recibir información sobre Ciclos Formativos da Formación Profesional de Grao Superior e sobre Carreiras Universitarias que se poden cursar no Sistema Universitario de Galiza (SUG).


Asistimos a algunha conferencia, demostracións, recollimos folletos, e vimos 'in situ' como é eso da Formación Profesional de Grao Superior e como son as diferentes carreiras universitarias...
Diunos tempo para poñernos en forma como se pode apreciar en algunha imaxe e ver desde o alto unha perspectiva diferente das saídas do Bacharelato.

Creo que foi productivo e quen máis, quen menos poido informarse daquelo que máis lle interesaba.

miércoles, 25 de abril de 2007

¡¡Estamos de estrea!!: O LOGO do Instituto




A proposta do Departamento de Plástica e da Comisión de Normalización o Consello Escolar aprobou o que será logotipo do IES CARLOS CASARES; do noso instituto.

O Departamento de Plástica conxuntamente coa Comisión de Normalización Lingüística, decidiron este curso escolar levar a cabo unha idea que hai anos lles viña rondando polas súas cabezas: que o alumnado deseñase o logotipo do noso centro. A tal fin, convocaron un concurso de ideas do que resultaron gañadores ex aequo:

CLARA COPENA (1º ESO A) e ANDRÉ GARCÍA (1º ESO B).

Como xa constaba nas bases do concurso, a partir dos principais fundamentos existentes nestas dúas ideas gañadoras, elaborouse o actual logotipo que se presentou ao noso Consello Escolar para a súa aprobación e, no seu caso, para a súa divulgación e utilización en documentos do centro.

A imaxe resultante quere simbolizar, en primeiro lugar, que somos un centro educativo, representado neste caso polos dous C, un dentro do outro, buscando un enfoque construtivo, en actitude de “acollida” e entendemento, deixando un camiño definido de entrada á comprensión e ao diálogo. A cor vermella alude á fisionomía propia do centro, e a tuia, situada na entrada do noso recinto, está aquí utilizada como símbolo do crecemento físico e intelectual que experimenta o noso alumnado no paso polas nosas aulas.
O noso logotipo posúe unha letra sinxela e estruturada na cor azul cián corporativa da Xunta de Galicia.

jueves, 19 de abril de 2007

¡¡¡¡ERA xa ten logotipo!!!!

O Proxecto E.R.A. (Enerxías Renovables e Auga) do que forma parte o noso Instituto xunto co IES "Alto Almanzora" de Tíjola (Almería) o IES “Miguel Catalán” de Zaragoza e o IES “Punta Larga” de Candelaria (Tenerife) xa ten logotipo. Logotipo que foi elexido entre outros de gran calidade.

Este é o logotipo. ¿Que? ¿que vos parece? ¿a que mola?

E o 15 de Maio a Tíjola (Almería).... ;-)

lunes, 16 de abril de 2007

VISITA A DOCENTIA 2007

O venres, 13 de abril, os alumnos e alumnas de 4º de ESO foron a realizar unha visita a DOCENTIA 2007, o Salón monográfico de Educación, Formación e Emprego no IFEVI (Instituto Feiral de Vigo). Polo interese con que se lles aprecia nas fotografías, parece que os nosos alumnos e alumnas de 4º estaban interesados en recibir información no citado Salón.

Alí poidemos ver informacións de distintas Universidades, de Centros de Formación Profesional e doutros estudios que nos proporcionaron, ademáis da información in situ, folletos, carpetas con información, etc...

viernes, 13 de abril de 2007

IGUALDADE DE XÉNERO



Fai unhas semanas, dentro dun programa de concienciación sobre a igualdade entre mozos e mozas, estivo no noso instituto o "bus da igualdade". Tamén nos veu a falar unha traballadora sobre a súa experiencia en traballos considerados equivocadamente "masculinos".


Pero o importante é que cada un de nós nos fagamos cómplices da idea de que nacer home ou nacer muller non leva aparellado diferencias nin nos traballos, nin no trato, nin nas tarefas domésticas... Cecais teña que pasar algún tempo, pero creo que a xuventude de hoxe discrimina menos estes aspectos de xénero que a de hai algúns anos e, probablemente, a xuventude que vai seguir a esta discrimine aínda menos.

PROXECTO ERA: LOGOS

Xa temos finalistas do logo do proxecto.
Anímovos a que entredes e miredes a creatividade dos alumnos que participan no proxecto.

Esto quere dicir que promete...

Finalistas dos mellores logos.

lunes, 12 de marzo de 2007

Video de difusión do Proxecto ERA

Oferta educativa do Instituto



Aquí mostro un esquema da oferta do IES Carlos Casares e das saídas que proporcionan para os nosos alumnos e alumnas. Se pinchades na imaxe, farase mais grande e lexible.

No noso Instituto ofrecemos a Ensinanza Secundaria Obrigatoria (ESO), os Bacharelatos que se citan no gráfico e un Programa de Garantía Social (PGS) para aqueles alumnos que non obteñen o título de Graduado en ESO.

Proxecto ERA

O Proxecto E.R.A. (Enerxías Renovables e Auga) é un proxecto, como ben o seu nome indica sobre educación ambiental e aforro enerxético. Vaise desenvolver en dous anos (este no que estamos e o próximo) conxuntamente cos centros: IES Alto Almanzaora (Tíjola-Almería), IES Miguel Catalán (Zaragoza), IES Punta Larga (Candelaria-Tenerife).

Temos unha páxina Web por medio da que traballamos 'on line' e na que imos poñendo información dos traballos realizados:

Pincha aquí para ver a páxina

OBXECTIVOS XERAIS:

- Crear vínculos entre comunidades educativas entre entornos medioambientais diferentes (Aragón, Canarias, Andalucía e Galicia) para coñecer problemas, alternativas e solucións encamiñadas a un desarrollo sostible en torno á auga e á enerxía.

- Favorecer a relación entre os estudiantes co fin de enriquecer a súa formación e información en temas medioambientais.


OBXECTIVOS ESPECÍFICOS:

- Comprender a importancia da auga como recurso limitado.

- Detectar as principais necesidades ambientais e de saude.

- Apuntar solucións positivas, imaxinativas, solidarias e sostibles.

- Coñecer métodos de aforro de auga e poñelos en práctica nos centros participantes.

- Acceder ó coñecemento da cultura doutras comunidades autónomas favorecendo o intercambio de profesorado e alumnado para a súa aproximación.

- Tomar conciencia do consumo enerxético da sociedade moderna e a súa dependencia dos combustibles fósiles ou enerxía nuclear.

- Valorar as posibilidades da enerxía solar e dos seus beneficios e estudiar e valorar o seu rendemento nos entornos de cada centro.


ACTIVIDADES:

Traballaremos con caracter transversal nas materias de Xeoloxía, Bioloxía, Ciencias Medioambientais, Física e Química, Ciencias Sociais, Tecnololoxía, Educación Plástica e Visual e Matemáticas.

Actividades cooperativas entre os catro centros:

- Encontro entre profesores e alumnos en Tíjola (Almería) no ano 2007 e en Zaragoza no ano 2008.

- Planificación de actividades conxuntas para estes encontros.


Actividades a desenvolver e cada centro:

- Saídas.

- Investigación de consumo de auga e enerxía no noso entorno.

- Recollida de información medioambiental nos medios.

- Plans de aforro enerxético e de auga.



Este é un resumo das actividades do noso proxecto. En días sucesivos iremos informando da evolución das mesmas, así como de ir poñendo nesta mésma páxina resultados desas actividades.

jueves, 22 de febrero de 2007

Caixa de suxestións



Enviade comentarios a esta nova para facer suxestións acerca de:
  • Ligazóns interesantes para poñer na barra lateral
  • Fontes de novas sindicadas
  • Outros asuntos

Precisamos redactores


Os compañeiros e compañeiras que queirades participar como redactores falade comigo no instituto. Quede claro que este blog é para publicar novas e avisos de interese máis ou menos xeral para profesorado, alumnado e familias.

Organización deste blog

Nun blog todos os artigos organízanse en orde cronolóxica inversa: os contidos máis recentes figuran sempre en primeiro lugar. Sen embargo, tamén é posible estruturar o blog tematicamente asignando unha ou varias etiquetas temáticas a cada nova ou artigo, de xeito que os lectores interesados nun tema específico poidan visualizar só os artigos dese tema premendo na etiqueta correspondente da barra lateral.

¿Por que un blog do instituto?

Por moitas razóns, por exemplo:
  • Publicar novas é tan sinxelo como redactar unha mensaxe de correo nunha interface de correo web.
  • Permite a existencia de varios redactores e/ou administradores: o traballo pode distribuírse entre varios de xeito que cada un informe sobre temas da súa responsabilidade ou interese.
  • A modificación da páxina faise directamente no servidor: non é necesario usar ningún programa de edición de páxinas web e logo subir os ficheiros ao servidor.
  • A edición pódese facer en calquera ordenador que teña acceso a internet desde calquera parte do mundo: só se require un navegador da web.

Orientación


Neste apartado irei poñendo noticias de interese para os alumnos con respecto á súa orientación vocacional.


Tamén se incluirá información relativa á oferta educativa e diversos aspectos do Instituto Carlos Casares de Vigo que o Departamento de Orientación ten baixo a súa responsabilidade.


Espero que sexa útil.


lunes, 12 de febrero de 2007

O IES Carlos Casares estrea o seu blog

Poño en marcha este blog a petición de Almudena.